Майкл Жексоны өв залгамжлагчид хэрхэн амьдардаг бэ?

Майкл Жексоны гурван хүүхэд Принс, Парис, Бланкет (одоогийн нэрээр Биги) эцгийгээ нас барснаас хойш олны анхаарлын төвд амьдарч ирсэн. Гэвч асар их хөрөнгө, нэр алдартай хүний үр удам байх нь тэдэнд адислал бус, харин хүнд дарамт, хүлээлт авчирсан гэж хэлж болно. Сүүлийн жилүүдэд Жексоны гэр бүл дотоод зөрчил, өв залгамжлал, мөнгө төгрөгтэй холбоотой асуудлаар хэд хэдэн удаа шуугианд өртжээ. Зарим эх сурвалжийн мэдээлснээр, тэд өнгөрсөн хугацаанд тодорхой хүмүүстэй “чимээгүй байхын төлбөр” буюу нөхөн төлбөрийн гэрээ байгуулсан гэжээ. Энэ бүхэн нь дэлхийн хамгийн алдартай гэр бүлийн нэр хүндэд толбо үлдээсэн юм.

Парис Жексон багаасаа сэтгэлзүйн хямрал, эцгийнхээ гашуун үхэлтэй нүүр тулж, 2019 онд амиа хорлох оролдлого хүртэл хийж байсан ч өнөөдөр тэр бүрэн өөрчлөгджээ. Өдгөө 27 настай тэрбээр зургаан жилийн турш мансууруулах бодис, архинаас татгалзаж, хөгжмийн уран бүтээлдээ төвлөрөн “амьдралынхаа хамгийн эрүүл, тогтвортой үе”-дээ орсон гэжээ. Мөн тэрээр өнгөрсөн алдаагаа нээлттэй хуваалцаж, бусдад анхааруулга, урам зориг өгдөг байна.

Парис Жексон эцгийнхээ алдрыг түшиглэхээс илүү, өөрийн дуу хоолойгоороо үнэлэгдэж, уран бүтээлчийн хувьд бие даан танигдахыг зорьж байна. Тэр найз Гэбриэл Гленнтэй хамт “The Soundflowers” нэртэй хамтлаг байгуулж, дуу хөгжимөөрөө сэтгэлзүйн шархаа анагаан, бусдад урам зориг өгөхийг хүсдэг гэдгээ ярьжээ.

“Алдартай гэр бүлд төрөх нь хүмүүсийн нүдэнд аз завшаан мэт харагддаг ч, үнэндээ хамгийн том сэтгэлзүйн сорилт болдог” хэмээн Парис нэгэн ярилцлагадаа хэлсэн байна.