Шинэ "GLE"-ийн хамгийн анзаарагдах өөрчлөлт нь брэндийн бэлгэ тэмдэг болсон одон логог илүү өргөн хүрээнд ашигласан явдал юм. Лого нь зөвхөн радиаторын торон дээр бус, гэрлийн хийцэд хүртэл шингэсэн нь загварыг илүү өвөрмөц болгожээ. Мөн урд болон арын гэрлүүд шинэ хээтэй болж, хажуу толины шугам болон дугуйн загвар шинэчлэгдсэн нь автомашиныг илүү дэгжин, спортлог төрхтэй болгосон байна.
Салон дотор "GLE" нь бүрэн дижитал удирдлагын төв болон өөрчлөгджээ. Үүний гол онцлог нь “MBUX Superscreen” систем бөгөөд 12.3 инчийн гурван дэлгэцийг нэг шилэн дор нэгтгэсэн шийдэл юм.
Түүнчлэн:
- Хиймэл оюун ухаанд суурилсан виртуал туслах систем
- Нэмэгдсэн бодит байдлын (AR) навигац
- Смартфонд суурилсан дижитал түлхүүр
зэрэг технологийн дэвшлүүдийг нэвтрүүлсэн байна. Шинэ жолооны хүрд, тансаг материалууд нь жолооч болон зорчигчдод илүү тав тухтай орчныг бүрдүүлжээ.
Шинэ "GLE" загвар нь 4.0 литрийн V8 хөдөлгүүртэй, 537 морины хүчин чадал гаргах боломжтой хэвээр байна. Үүнээс гадна ихэнх хувилбарууд 48 вольтын “зөөлөн гибрид” системтэй болж, түлшний хэмнэлт болон хурдасгалын жигд байдлыг сайжруулжээ. Мөн "plug-in hybrid" хувилбар болох "GLE 500e" нь 429 морины хүчин чадалтай бөгөөд зөвхөн цахилгаанаар 100 гаруй км зам туулах боломжтой нь хотын хэрэглээнд илүү тохиромжтой шийдэл болж байна.
Спортлог жолоодлогыг эрхэмлэгчдэд зориулсан "Mercedes-AMG GLE 53" хувилбар мөн танилцуулагдсан. Энэхүү загвар нь гибрид болон plug-in hybrid хувилбартайгаар гарч, гүйцэтгэл болон үр ашиг хоёрыг хослуулжээ. Түүнчлэн "E-Active Body Control" систем нь замын нөхцөлийг секундэд 1000 хүртэл удаа шинжилж, автомашины тэнцвэр, тогтвортой байдлыг автоматаар тохируулдаг байна. Ингэснээр жолоочид ямар ч нөхцөлд илүү хөнгөн, аюулгүй жолоодлогын мэдрэмжийг өгнө.
Шинэчлэгдсэн "GLE" нь зөвхөн гадна байдал төдийгүй дотоод технологи, хөдөлгүүрийн шийдлээрээ томоохон ахиц гаргасан байна. Энэ нь тансаг SUV сегментэд илүү хүчтэй өрсөлдөхүйц, ирээдүйг илтгэх загвар болж чаджээ.
