Олон хүн бусдад сайн сэтгэгдэл төрүүлэхийн тулд алдаа гаргахгүй, бүхнийг мэддэг мэт харагдахыг хичээдэг. Гэвч хэт төгс дүр төрх заримдаа хүмүүсийг холдуулдаг. Харин жижигхэн алдаа, энгийн сул талаа нуухгүй байх нь эсрэгээрээ илүү ойр, илүү хүнлэг санагдуулдаг байна.
Жэк Шафер шинэ оюутнуудад хичээл заахдаа заримдаа үгийг санаатайгаар буруу дуудаж, оюутнуудаар өөрийгөө засуулах боломж олгодог байжээ. Ингэснээр оюутнууд багшаасаа айхгүй, харилцаа илүү чөлөөтэй болдог аж. Мөн тэд өөрсдөө алдаа гаргахаас бага эмээдэг.
Хүн бүр өөрийн амьдрал, бодол, туршлага, амжилтынхаа талаар ярих дуртай. Тиймээс бусдад таалагдахыг хүсвэл өөрийгөө гайхуулах гэж яарахаас илүүтэйгээр нөгөө хүнээ чин сэтгэлээсээ сонирхох хэрэгтэй.
Ажил, гэр бүл, хобби, зорилго, үзэл бодлынх нь талаар асууж, хариултыг нь анхааралтай сонс. Гэхдээ байцаалт авч байгаа мэт олон асуулт дараалан тавих хэрэггүй. Харин яриаг нь үргэлжлүүлж, үнэхээр сонирхож байгаагаа харуулах нь чухал.
Шууд магтаал заримдаа хэт хиймэл, эсвэл долигонож байгаа мэт сонсогдож болно. Харин гуравдагч хүний үгээр дамжуулсан магтаал илүү үнэмшилтэй, илүү зөөлөн хүрдэг.
Жишээлбэл, “Чи үнэхээр мундаг шүү” гэж шууд хэлэхийн оронд “Өчигдөр Бат чиний хийсэн ажлыг их сайн болсон гэж ярьж байсан” гэж хэлбэл илүү бодитой сонсогдоно. Учир нь магтаал зөвхөн танаас биш, өөр эх сурвалжаас ирж байгаа мэт мэдрэмж төрүүлдэг.
Хүмүүс зөвлөгөө сонсохоосоо илүү өөрийг нь ойлгож байгаа хүнийг илүү дотно хүлээж авдаг. Тиймээс хэн нэгэн танд хэцүү өдөр өнгөрүүлсэн тухайгаа ярьж байвал шууд шийдэл заах гэж яарах хэрэггүй.
“Тийм зүйл тохиолдвол үнэхээр хэцүү санагдах байх”, “Чи нэлээд ядарсан байх даа”, “Ингэж амжилт гаргасандаа их баяртай байгаа байх” гэх мэтээр тухайн хүний мэдрэмжийг ойлгож байгаагаа илэрхийлэхэд хангалттай.
Хачирхалтай сонсогдож магадгүй ч бусдаас жижигхэн тусламж хүсэх нь харилцааг ойртуулахад тусалдаг. Энэ үзэгдлийг Америкийн улс төрч Бенжамин Франклины нэрээр “Франклины нөлөө” гэж нэрлэдэг.
Хүн хэн нэгэнд тусалсны дараа өөрийн үйлдлээ зөвтгөх хандлагатай байдаг. Өөрөөр хэлбэл “Би энэ хүнд тусалсан юм чинь энэ хүн надад таалагддаг байх” гэж өөрийн мэдэлгүй бодож эхэлдэг байна.
Шууд магтаал заримдаа эвгүй санагддаг. Тиймээс хүнийг өөрийнхөө амжилт, давуу талаа өөрөөр нь яриулах нь илүү үр дүнтэй арга юм.
Жишээлбэл, хэн нэгэн сайн ажил хийсэн бол “Чи мундаг юм аа” гэж хэлэхээс гадна “Үүнийг хийхэд хамгийн хэцүү хэсэг нь юу байсан бэ?”, “Ийм үр дүнд хүрэхийн тулд чи яаж бэлдсэн бэ?” гэж асууж болно. Ингэснээр тухайн хүн өөрийн хөдөлмөр, чадвар, тэвчээрийг өөрөө анзаарч эхэлдэг.