Хуурай хууль хэрэгжиж эхэлсний дараа олон хууль бус худалдаа эрхлэгчид үйлдвэрийн зориулалттай спиртийг худалдан авч, цэвэршүүлэн архи болгон нууцаар худалдаалдаг болсон байна. Үүнийг таслан зогсоохын тулд АНУ-ын засгийн газар үйлдвэрийн спиртэнд формальдегид, мөнгөн усны давс, хинин зэрэг хорт бодис хольж эхэлжээ. Гэвч энэ арга нь хууль бус наймаачдыг зогсоож чадаагүй бөгөөд харин энгийн иргэд хамгийн их хохирол амссан байна. 1926 оны Зул сарын баярын үеэр зөвхөн Нью-Йорк хотод ийм хордлогоор 31 хүн нас барсан бөгөөд хуурай хуулийн туршид нийтдээ 10 мянга орчим хүн хордож амиа алдсан гэж үздэг.
Хуурай хууль гарахаас өмнө Америкийн хөдөө орон нутагт алимны дарс хамгийн түгээмэл согтууруулах ундааны нэг байжээ. Үүнээс болж дарс хийхэд ашигладаг жижиг, исгэлэн сортын алимны моддыг олноор нь тайрч устгасан байна. Ийнхүү олон жилийн хөдөлмөрөөр бий болсон алимны цэцэрлэгүүд устаж, Америкийн домогт Жонни Апплсидийн тарьсан алдарт цэцэрлэг хүртэл энэ хувь заяаг тойрч чадаагүй гэдэг.
Архи үйлдвэрлэхийг хориглосноор олон үйлдвэр дампуурах аюултай нүүр тулсан тул тэд шинэ бүтээгдэхүүн үйлдвэрлэж эхэлсэн байна. Зарим нь зайрмаг, хийжүүлсэн ундаа, сүү, соёолжны сироп үйлдвэрлэж байсан бол “Coors” компани үйлдвэрийн керамик эдлэл, очлуур хүртэл хийдэг болжээ. Харин зарим үйлдвэр будгийн үйлдвэр гэсэн нэрийн дор нууцаар архи үйлдвэрлэсээр байсан бөгөөд өдөрт хэдэн арван мянган долларын хууль бус ашиг олдог байв.
Хуурай хууль архийг эмчилгээний зориулалтаар хэрэглэхийг зөвшөөрсөн нь хүмүүсийн ашигладаг хамгийн том цоорхой болжээ. Виски үйлдвэрлэгчид эм үйлдвэрлэх тусгай зөвшөөрөл авч, эмч нар олон хүнд вискиг эмчилгээний жороор бичиж өгдөг байсан байна. Ихэнх тохиолдолд өвчтөнүүдэд ямар нэгэн өвчин байгаагүй бөгөөд эмч нар "яаралтай үед хэрэглээрэй" гэсэн шалтгаанаар жор бичдэг байжээ.
Арьс өнгөөр ялгаварлан гадуурхдаг “Ку-Клукс-Клан” байгууллага хуурай хуулийг хэрэгжүүлэхэд хамгийн идэвхтэй оролцсон хүчний нэг байсан юм. Тэд хууль бус архи зардаг хүмүүсийг олж, зодох, давирхай асгаж өд наах, уушийн газрыг шатаах, бааруудыг сүйтгэх зэрэг хүчирхийлэл үйлддэг байжээ. Зарим тохиолдолд хууль зөрчигчдийг бүр хөнөөсөн тохиолдол ч гарсан байдаг.
Дарсны үйлдвэрүүд хаагдсаны дараа усан үзмийн тариаланчид шахмал өтгөрүүлсэн усан үзмийн бүтээгдэхүүн үйлдвэрлэн худалдаалж эхэлсэн байна. Энэхүү бүтээгдэхүүнийг усанд уусгахад жирийн усан үзмийн шүүс болдог байв. Харин савлагаан дээр нь "Харанхуй сэрүүн газар 21 хоног хадгалж болохгүй. Тэгвэл санамсаргүйгээр дарс болж хувирна" гэсэн егөөтэй анхааруулга бичдэг байсан нь худалдан авагчдад юу хийхийг нь бараг зааж өгч байжээ. Үүний үр дүнд ийм бүтээгдэхүүний эрэлт эрс өссөн байна.
Хуурай хуулийг бүх хүн дэмжээгүй бөгөөд олон улс төрч энэ хуулийг хэрэгжих боломжгүй гэж үздэг байсан юм. Конгрессын гишүүн Фьорелло Ла Гуардиа хуурай хуулийг "утгагүй бөгөөд үр ашиггүй" гэж олон нийтэд ил тод шүүмжилдэг байжээ. Түүний энэ байр суурийг Нью-Йорк хотын иргэд өндрөөр үнэлж, хууль хүчингүй болсны дараа түүнийг хотын даргаар сонгосон байна.
Хуурай хуулийг хамгийн хүчтэй дэмжигчдийн нэг байсан “Эмэгтэйчүүдийн Христийн шашны Тэмцэгчдийн Холбоо” архины хор уршгийг тайлбарлахдаа шинжлэх ухааны үндэслэлгүй олон зүйл ярьдаг байсан байна. Тухайлбал, архи хүний цусыг ус болгон хувиргадаг, хүүхдийн өсөлтийг бүрэн зогсоодог, ходоодонд орсон хоолыг хор болгодог, тэр ч байтугай архи уусан хүн дотроосоо шатаж үхэж болно гэж сурталчилдаг байжээ.
Хэдийгээр Конгресс хуурай хуулийг баталсан ч зарим хууль тогтоогч өөрсдөө архи хэрэглэхээ зогсоогоогүй байна. Дэлхийн нэгдүгээр дайны ахмад дайчин Жорж Кэссиди Конгрессын гишүүдэд нууцаар архи нийлүүлдэг байсан бөгөөд түүнд хүртэл Конгрессын байранд өрөө гаргаж өгсөн байдаг. Энэ байдал хэдэн жилийн турш үргэлжилсний эцэст илэрч, Кэссиди баривчлагдан хоригдож байжээ.
Хуурай хуулийн үед "Jamaica Ginger" хэмээх цагаан гааны хандыг эмийн зориулалтаар чөлөөтэй зардаг байв. Гэвч энэ бүтээгдэхүүнд хуульд нийцүүлэхийн тулд триортокрезилфосфат гэх химийн бодис нэмсэн нь аймшигтай үр дагавар авчирсан юм. Үүнийг уусан олон хүн гар, хөл нь салганаж, таталт өгч, улмаар доод мөчдийн саажилттай болжээ. Судлаачдын үздэгээр 100 мянга орчим хүн хордож, тэдгээрээс 10 мянга орчим нь насан туршдаа тахир дутуу болсон байна.