Элена Рубинштейн 1936 онд Нью-Йоркт шинэ салонаа нээхдээ энгийн нэгэн гоо сайхны газар байгуулаагүй юм. Тэр үүнийг эмэгтэйчүүд өөрийн гоо үзэсгэлэнгээ илүү сайн ойлгож, арчлах боломжтой “гоо сайхны шинэ ертөнц” хэмээн танилцуулжээ. Тухайн үеийн зар сурталчилгаанд салонд ирсэн эмэгтэйчүүд хотын чимээ шуугианаас түр холдож, мэргэжилтнүүдийн тусламжтайгаар өөртөө анхаарал хандуулах боломжтой гэж онцолж байв.
Өнөөдөр арьсны оношилгоо хийлгэх нь ердийн зүйл мэт санагддаг. Харин 1930-аад онд энэ нь нэлээд шинэлэг ойлголт байлаа. Рубинштейний салонд үйлчлүүлэгчийн арьсыг тусгай төхөөрөмжөөр шалгаж, дараа нь тохирох арчилгаа, процедурыг санал болгодог байжээ.
Үйлчлүүлэгчид зөвхөн нэг үйлчилгээ сонгохоос гадна бүтэн өдрийг салонд өнгөрөөх “beauty day” буюу “гоо сайхны өдөр”-т урьдчилан бүртгүүлж болдог байв. Тэнд арьс арчилгаа, үс засалт, нүүр будалт, биеийн дасгал зэрэг олон үйлчилгээг нэг дор авах боломжтой байжээ.
Рубинштейн гоо сайхныг зөвхөн гаднах төрхтэй холбон ойлгодоггүй байв. Үйлчлүүлэгчийн өндөр, жин, цусны даралт зэрэг үзүүлэлтийг хэмжиж, бүр суурь бодисын солилцооны түвшин (BMR)-ийг тооцдог байжээ. Ингэснээр гоо сайхны арчилгааг зөвхөн нүүрэндээ тос түрхэхээс илүү өргөн хүрээнд авч үзсэн байна.
Өнөөдрийн томоохон wellness төвүүдийн нэгэн адил Рубинштейний салонд гоо сайхны процедуроос гадна биеийн тамирын хэсэг байсан. Гимнастикийг гоо сайхны арчилгааны нэг хэсэг гэж үзэж, үйлчлүүлэгчдэд биеийн галбиртаа анхаарах боломж олгодог байжээ.
Салоны үйлчилгээний цар хүрээ бүр ч сонирхолтой.
Энд:
- спортын заал
- кино театр
- ресторан
- номын сан
- солярий
- үсчин
- гоо сайхны кабинетууд байжээ.
Өөрөөр хэлбэл, эмэгтэйчүүд хэдэн цагийн турш салонд байж, гоо сайхан болон амралтыг хослуулах боломжтой байсан гэсэн үг.
Рубинштейн арьсыг хуурай, хэвийн, тослог гэсэн үндсэн төрлүүдээр ангилах ойлголтыг түгээн дэлгэрүүлсэн хүмүүсийн нэг юм. Тэр мөн усны хамгаалалттай сормуусны будаг, арьсыг гүн цэвэрлэх бүтээгдэхүүн, витамин агуулсан тос, чийгшүүлэгч шингэн крем зэрэг бүтээгдэхүүнийг хөгжүүлж, гоо сайхны бүтээгдэхүүнийг илүү шинжлэх ухаанч байдлаар сурталчилж эхэлсэн.
Нью-Йоркийн салон амжилт олсны дараа Рубинштейн 1937 онд Парист Faubourg Saint-Honoré салонаа шинэчлэн нээжээ. Тэнд бүр илүү олон төрлийн тоног төхөөрөмж байрлуулсан байна. Түүний байгуулсан салон, дэлгүүрүүд удалгүй АНУ, Франц, Их Британид тархаж, Элена Рубинштейн гоо сайхны бизнесийн хамгийн алдартай нэрсийн нэг болжээ.
Өнөөдөр арьсны оношилгоо, фитнес, хооллолтын зөвлөгөө, гоо сайхны процедур, үсчин, амралтыг нэг дор багтаасан beauty & wellness төвүүд олон болсон. Харин үүнээс бараг 90 жилийн өмнө Элена Рубинштейн ийм концепцийг бий болгож байжээ. Түүний хувьд гоо сайхан гэдэг зөвхөн нүүр царай биш, харин арьс, үс, бие, хооллолт, дасгал хөдөлгөөн, өөртөө анхаарах бүхэл бүтэн амьдралын хэв маяг байв.