АНУ-ын Рэйнмэйкер (Rainmaker) компани олон жилийн турш ашиглагдаж ирсэн үүл буудах аргыг орчин үеийн дрон, программ хангамжтай хослуулжээ. Энэ арга нь хэт хөрсөн үүлэнд мөнгөний иодид хэмээх бодисын бичил хэсгүүдийг тарааж, мөсөн талст үүсэх явцыг дэмжихэд чиглэдэг. Үүссэн талстууд тодорхой нөхцөлд томорч, хур тунадас болон газарт унах боломжтой. Гэхдээ уг арга нь цаг агаарыг хүссэнээрээ өөрчлөх бус, байгаа үүлний хур тунадас үүсэх боломжид нөлөөлөх зорилготой.
Рэйнмэйкер (Rainmaker)-ийн Элайжа (Elijah) дрон нь 25 кг-аас бага жинтэй бөгөөд өндөрт нисэх зориулалттай. Дронд суурилуулсан мэдрэгчүүд агаарын температур, чийгшил зэрэг атмосферийн мэдээллийг цуглуулдаг. Харин Стратус (Stratus) программ нь радар болон хиймэл дагуулын мэдээллийг ашиглан үүлэнд реагент тараахад тохиромжтой хэсгийг тодорхойлоход тусалдаг. Ингэснээр үүл буудах ажиллагааг өмнөхөөсөө илүү нарийвчлалтай төлөвлөх боломж бүрдэж байна.
Рэйнмэйкер (Rainmaker) наймдугаар сарын 23-нд Аляскийн Кенайн хойгт технологийн туршилт хийжээ. Дронууд 10 удаа нисэж, 3500–4200 метрийн өндөрт орших үүлэнд мөнгөний иодид агуулсан капсулуудыг тараасан байна. Нийт 375 грамм реагент ашигласан туршилтын үеэр гурван цагийн хугацаанд ойролцоогоор 2300 м³ хур тунадас бүртгэгдсэн гэж компани мэдээлжээ. Гэхдээ хур тунадасны хэмжээнд байгалийн цаг агаарын нөхцөл мөн нөлөөлдөг тул технологийн үр нөлөөг үнэлэхэд нэмэлт судалгаа шаардлагатай.
Онгоц болон пуужин ашигладаг уламжлалт аргуудтай харьцуулахад дрон нь реагентийг үүлний тодорхой хэсэгт илүү нарийн хүргэх боломжтой. Мөн дроны нислэгийн зардал харьцангуй бага тул ажиллагааг хямдруулах боломжтой гэж үзэж байна. Радар, хиймэл дагуулын мэдээлэлтэй хослуулснаар реагентийг хаана, хэзээ ашиглахыг илүү оновчтой төлөвлөх боломжтой. Тиймээс уг технологийг цаг агаарыг удирдах арга гэхээсээ илүү тодорхой нөхцөлд хур тунадас нэмэгдэхэд нөлөөлөх боломжийг судалж буй технологи гэж ойлгох нь з