Холбрук нь Сидней, Мельбурн хотуудын дунд орших жижигхэн хот. Тэнд гаднаасаа энгийн үйлдвэрийн байр шиг харагдах нэгэн байгууламж бий. Гэхдээ дотор нь ердийн агуулахад байдаг зүйл огт байхгүй. Энд нас барсан долоон хүний биеийг крионик аргаар хадгалж байна. “Southern Cryonics” компани уг байгууламжийг 2023 оноос ажиллуулж эхэлсэн бөгөөд анхны “өвчтөн”-өө 2024 оны тавдугаар сард хүлээн авчээ. Хамгийн залуу нь 40 гаруй настай, хамгийн ахмад нь 90 гаруй настай байжээ. Тэдний зорилго нэг: ирээдүйд анагаах ухаан өнөөдөр эмчилж чадахгүй байгаа өвчин, гэмтлийг засах хэмжээнд хүрвэл дахин амьдрах боломжийг хүлээх. Гэхдээ одоогоор хэн ч тэднийг сэрээж чадахгүй.
Крионик хадгалалт нь хүний биеийг зүгээр л хөлдөөхөөс илүү нарийн үйл явц. Хүн нас барсны дараа биеийг хурдан хөргөж, ""криопротектор" хэмээх тусгай уусмал нэвтрүүлэн мөсөн талст үүсэж, эсийг гэмтээхээс сэргийлдэг. Дараа нь “витрификаци” буюу эд эсийг мөс үүсгэхгүйгээр шилэн төлөвт оруулахыг зорьдог. Гэвч хүний бүх эд, эрхтэнд уусмалыг жигд хүргэх, ижил хурдаар хөргөх нь маш хэцүү тул зарим хүний биеийг бүрэн витрификаци хийх боломжгүй байдаг.
Крионик хадгалалт гэдэг нь хүний биеийг зүгээр л хөлдөөгөөд саванд хийхтэй адилгүй. Хүн нас барсны дараа биеийг аль болох хурдан хөргөнө. Дараа нь цусны эргэлтийг сэргээхтэй төстэй арга ашиглан тусгай уусмал нэвтрүүлдэг. Энэ уусмалыг криопротектор гэж нэрлэдэг. Яагаад хэрэгтэй вэ? Энгийнээр хөлдөөх үед эсийн доторх ус мөсөн талст болж, эсийн бүтцийг гэмтээдэг. Харин криопротектор нь энэ гэмтлийг багасгах зорилготой. Дараагийн шатанд витрификаци буюу эд эсийг ердийн мөс үүсгэхгүйгээр шилэн төлөвт оруулахыг зорьдог. Гэхдээ энд нэг том асуудал бий. Хүний бие маш нарийн бүтэцтэй. Бүх эд, эрхтэнд криопротекторыг жигд хүргэх, бүх биеийг ижил хурдаар хөргөх боломж одоогоор төгс шийдэгдээгүй. Тиймээс хадгалагдаж буй хүмүүсийн заримынх нь биеийг бүрэн витрификаци хийх боломжгүй байсан байна.
Ийм үйлчилгээ мэдээж хямд биш. “Southern Cryonics”-ийн мэдээллээр биеийг крионик аргаар хадгалж, урт хугацаанд хамгаалах үндсэн зардал ойролцоогоор 200 мянган австрали доллар. Хөтөлбөрт урьдчилан хамрагдаагүй бол энэ үнэ 230 мянган доллар орчим хүрнэ. Үүн дээр биеийг бэлтгэх, тээвэрлэх зэрэг нэмэлт зардал орно. Гэхдээ хамгийн сонирхолтой нь — та 200 мянган доллар төлөөд “дахин амьдрах эрх” худалдаж авч байгаа хэрэг биш. Яагаад гэвэл тийм технологи одоогоор байхгүй. Компанийн өөрийн гэрээнд ч өнөөдөр ашиглаж буй крионик хадгалалтын арга нь хүний биед эргэлт буцалтгүй гэмтэл учруулж болзошгүйг дурдсан байдаг. Тиймээс эдгээр хүмүүсийн төлсөн мөнгө бол баталгаатай ирээдүйн төлөө биш. Харин боломж байж магадгүй гэсэн найдварын төлөө юм.
Хамгийн том асуулт нь — тэднийг үнэхээр хэзээ нэгэн цагт сэрээж чадах уу? Өнөөдөр эс, үр хөврөлийг хөлдөөж хадгалах боломжтой ч бүхэл бүтэн хүний бие, ялангуяа тархи, ой санамж, ухамсрыг хадгалсны дараа сэргээх технологи одоогоор байхгүй. “Southern Cryonics”-ийн зүгээс 250 жилийн дараа сэргээх боломжийг ойролцоогоор 10 хувь гэж үнэлсэн бол байгууламжийн менежер Филип Роудс анхны оролдлого 2080 оны орчимд хийгдэж магадгүй гэж үздэг. Гэхдээ энэ нь зөвхөн таамаг. Тиймээс −196°C-т хадгалагдаж буй долоон хүн өнөөдөр ирээдүйг хүлээж байна. Магадгүй хэдэн арван жилийн дараа, магадгүй 250 жилийн дараа — эсвэл хэзээ ч биш.