Гар утас нь мэдээлэл дамжуулахдаа радио давтамжийн цахилгаан соронзон долгион ашигладаг. Ялангуяа дуудлага хийх, файл татах, мэдээлэл дамжуулах үед төхөөрөмж радио давтамжийн дохио ялгаруулдаг. Гэхдээ одоогоор гар утасны хэрэглээ болон хорт хавдар зэрэг өвчний хооронд шууд шалтгаант холбоо бий гэдгийг судалгаагаар эцэслэн тогтоогоогүй байна. Тиймээс мэргэжилтнүүд “гар утас заавал өвчин үүсгэдэг” гэж хэлэхээс илүүтэйгээр, удаан хугацаанд биед ойр байлгах шаардлагагүй үед зай барихыг урьдчилан сэргийлэх арга гэж үздэг.
Утас ашиглах үедээ чанга яригч, чихэвч ашиглах, дуудлага хийхдээ төхөөрөмжийг толгой болон биедээ удаан хугацаагаар наахгүй байх нь радио давтамжийн өрөлтийг бууруулахад тусална. “Apple” зэрэг үйлдвэрлэгчид ч төхөөрөмжийнхөө мэдээлэлд радио давтамжийн өртөлтийн талаар анхааруулга, зөвлөмж оруулдаг. Тухайлбал, “iPhone”-ийн радио давтамжийн өртөлтийн мэдээлэлд төхөөрөмжийг биед тодорхой зайтай ашиглах шаардлагатайг тайлбарладаг.
Хүүхдийн бие, тархи хөгжиж байгаа учраас гар утасны хэрэглээнд болгоомжтой хандахыг зарим эрүүл мэндийн байгууллага зөвлөдөг. Ялангуяа унтах үед утсыг дэрний доор эсвэл хүүхдийн толгойн яг хажууд байрлуулахгүй байх нь зүйтэй. Гар утсаа орноосоо хол байлгах нь зөвхөн радио давтамжийн өртөлтийг багасгахаас гадна шөнийн цагаар мэдэгдэл, дэлгэцийн гэрэлд сэрэх, утсаа дахин дахин шалгах зэрэг нойронд нөлөөлөх дадлыг багасгахад тустай. Тиймээс утсаа дэрнийхээ хажууд тавьж унтдаг бол орныхоо дэргэд биш, боломжтой бол 1–2 метрийн зайд байрлуулж хэвшихэд гэмгүй.