Манай улсын уур амьсгалын онцлогоос шалтгаалж айлуудын байр, орон сууц, байшингийн тагт дийлэнх тохиолдолд өвөл, зуны хувцас зэрэг тухайн цаг үед хэрэглэгдэхгүй элдэв зүйлээр дүүрсэн агуулахын үүрэг гүйцэтгэдэг тул энэ хэсгийг бяцхан ажлын булан, кофе ууж, ном унших цэг эсвэл бүр хүүхдүүдэд зориулсан тоглоомын булан гэхчлэн маш олон янзын орчин бүрдүүлж тохижуулахад хамгийн тохиромжтой. 

Тагтаа засварлаж эхлэхээсээ өмнө танд яг ямар зориулалтай орон зай хэрэгтэй байгааг сайтар бодож үзэх хэрэгтэй. Ингэснээр хэрэг болох материал, шаардагдах цаг хугацаа, санхүүгийн зардал зэргийг нарийн тодорхой болгож өгнө. Хэрэв танай байр ашиглалтад ороод удаж байгаа бол тагтны гадна талд засвар хийх шаардлага үүсэж болно. 

Хүйтний улиралд ч тагтаа дулаахан, тав тухтай байлгахыг хүсвэл шаландаа халаалтын систем суурилуулах боломжтой. Танд урьд өмнө нь засварын ажилд оролцож байсан туршлага болоод цаг зав байгаа бол шаардлагатай бүх хэрэгслүүдийн тусламжтайгаар өөрөө ч тагтаа бүрэн өөрчлөх боломж бий.